الثلاثاء، 10 يونيو 2008

هل توافق تتجوز مدونة؟؟

هل توافق تتجوز مدونة
هل توافقي تتجوزي مدون
تقريبا كل مدونة بتكشف عن طبيعة صاحبها بشكل كبير وبتوضح اتجاهاته وتوجهاته سواء الدينية أو السياسية او غيرها,

وفعلا المدونات دي كشفت عن تفكير الشباب وقربت بينهم وبين الأجيال الأكبر منهم, يعني أنا مثلا استفدت كتير من معرفة افكار شباب الجيل ده وده ساعد كتير ان تفكيري لا يقف عند حدود ما اعلمه وأصبح عندي اتساع في الفهم وسعة في الصدر اكتر من الأول, وأنا سعيدة بكده وأتمنى اني أفضل كده علشان التعامل مع اولادي مستقبلا


اعتقد ان ابواب البحث عن زوجة زادت باب جديد بسبب عالم التدوين، بل بالعكس انا اعتقد ان المدونات بتكشف عن صاحبها بشكل اكبر من تواجده في اماكن تانية زي زمالة العمل مثلا, لان المدونة تعتبر متنفس كبير لافكار صاحبها وكونه بيكتب في عالم افتراضي فده بيديله مساحة اكبر من الحرية والصراحة اكتر من عالم الحقيقة


اينعم بتحصل دلوقتي لقاءات بين المدونين وبعضهم واقترب العالم الافتراضي من ارض الواقع لكن علشان تتم اللقاءات دي لازم على الاقل يكون في قدر من التوافق والقبول بين الناس المدونين اللي هايتقابلوا او تكون في حلقة وصل وسبب مشترك للقاءهم زي اللقاء اللي تم لتوقيع مدونات مصرية للجيب,

لدرجة ان اللي يتتبع تعليقات المدونين عن اللقاء يلاقي ان كل واحد قابل التاني وهو مكون فكرة اساسية عنه تكاد تقترب من الواقع كثيرا الا مثلا الشكل اللي بيكون مختلف تماما عن الصورة اللي تكونت في العقل وده معتاد


هاتكلم عن المدونات ذات الشكل الواضح الخالي من الابهام, المدونة اللي تدخلها تعرف بدون جهد صاحب المدونة بيفكر ازاي لدرجة انك لما تدخل تعلق عنده بتكون متحسب ان الكلمة دي ممكن تزعله أو التعليق ده ممكن يقلب التدوينة لمعركة أو حتى مجرد انك تتخيل ان تعليقك هيسيب ابتسامة على وجه صاحب المدونة


اذن لا يوجد مانع ان القدر ده من الوضوح ممكن يكون سبب لاعجاب مدون بمدونة أو العكس او كما يقال باللفظ كده: دي دماغها عاجباني او يتقال: ده شخصية عقلانية جدا
بتكلم طبعا في حدود الضوابط الشرعية ولا مجال للكلام ولا الطريقة الا يكون فيها افراط او تفريط


دلوقتي السؤال لو مدون اعجب بمدونة وحس ان طريقة تفكيرها وطبيعة شخصيتها مسيطرة على اجواء المدونة وتظهر في كل تدوينة بلا اختلافات مفاجئة وكذلك في التعليقات اللي بتتركها المدونة في المدونات التانية, ايه الطريقة السليمة اللي يقدر المدون يعملها علشان يتحرك في خطوات صحيحة وتصرفات مرتبة علشان يشرع فعلا في الأمر ده؟؟


طبعا ممكن ناس تستغرب لطريقة تفكيري نظرا لان التعارف بين اي شاب وفتاة الان ممكن يتم اسهل من تفكيري ده بكتير,, لكن اعتقد ان قطاع من الشباب مازال بيفكر بالطريقة دي حتى ولو من باب ان التعارف الاول يكون في الذاكرة الطيبة مدى الحياة لو تم المراد وحصل الزواج بالفعل.


وفي حاجة مهمة جدا انا لاحظتها من كلامي مع كتير من المدونات واللي اغلبهم ليه تفكير معين على الاقل متوافق مع تفكيري, ان عدد كبير منهم مدوناتهم سرية محدش من اهلهم يعرف انهم عاملين مدونة او حتى يعني ايه مدونة يعني معنى كده ان في فرص كويسة فعلا ممكن تتعرض على البنت والبنت تخاف اصلا انها تذكر لاهلها ان فلان ده عرفته عن طريق المدونة, ده كمان في اهل عندهم رعب من كلمة النت يعني صعب على البنت انها تقول في البيت انا جايلي عريس من النت,, ممكن تقول جايلي من اي حتة ان شالله من مترو الانفاق لكن النت لأ


طبعا اللي شاغل تفكيري الشباب الملتزم والبنات الرائعة اللي تحس انهم يستاهلوا كل خير وتلاقي نفسك بتدعي لحد منهم بدون متعرفه شخصيا, ولدرجة اني انا نفسي احيانا احس ان المدون ده ممكن يصلح للزواج من المدونة دي من شدة تقارب افكارهم


علشان اكون محددة اكتر في سؤالي
لو لقيت بنت مدونة عجبتك هتعمل ايه بالظبط علشان تمشي في الموضوع؟
وهل انت اصلا توافق تتزوج من مدونة؟؟؟ وفكر كويس في السؤال ده قبل ماتجاوب وعلشان تسأل نفسك بصراحة في بقية للسؤال هل لو فعلا شرعت في موضوع الزواج من مدونة هل اول طلب هتطلبه منها انها تنسى موضوع المدونة دي خالص وكأنها لم تكن؟ وبذلك تكون المدونة بدأت سرية وبعد كده تتلغي وهي تكون الواحدة كسبت بدالها زوج :)؟
يعني مطلوب ان اللي يفكر يحط اخته او بنته مكان المدونة وبعدين يرد

بجد التفكير ده موجود ومش كل الازواج بيوافقوا ان زوجاتهم يكون ليهم مدونات رغم سابق علمهم بتفكيرهم وطريقة تعاملهم مع المدونين الآخرين لكن احيانا ده بيتم من باب الباب اللي يجيلك منه الريح ومن باب يعني هتقولي اللي محدش قاله مالدنيا مليانة مدونات


طبعا الكلام ده هيكون اجمل لو نعرف رأي مشايخ يكونوا اتسألوا في مسألة التعارف بين الشباب عن طريق الانترنت بهدف الزواج ليس الا
منتظرة رأيكم

تحديث
في التعليقات على التدوينة كان في تعليق لمدونة جديدة اسمها خاطبة المدونات وانا زورت المدونة وعلقت عندهم وده تعليقهم وتعليقي

خاطبة المدونات يقول...

نريد متطوعون لإنجاح فكرة المدونة
ومن يجد في نفسه حب الخير فليتفضل
elkhatbah60@yahoo.com



انا زورت المدونة واحييكم على تحمسكم, بس اعتقد ان التعريف بيكم في المدونة غير كافي, اعتقد ان الزوار محتاجين يعرفوا اكتر عنكم, موضوع الزواج في حد ذاته صعب ولا يحتاج إلى امور فرعية تشغل بال طالب الزواج
بالنسبة لي انا لما طرحت مادار بتفكيري على هيئة تدوينة, لم أكن اقصد على الاطلاق موضوع عريس طالب عروسة وخاطبة وطلبات زواج, ولم اقصد الشكل المرتب ده وليست عندي القدرة اني افتح مدونة يكون هدفها الأساسي التزويج وذلك ربما لعدم مطابقة مواصفات الخاطبة علىّ وربما يكون السبب ان الانترنت الأن اصبح ملئ بمواقع التزويج بشكلها المعروف واكتب بياناتك واكتبي بياناتك ويلا بينا نوفق راسين في الحلال,
ولكن انا قصدت الاختيار الغير المخطط له, يعني شاب فعلا في عمر الزواج وهو بالفعل مدون وموجود على الساحة بأفكاره قبل كونه مشروع زوج وكذلك المدونة وكلاهما يكتب بطبيعته فعلا وبلا تكلف وبدون سعي خفي للحصول على شريك العمر,
وكما هو واضح في المجتمع التدويني ان كل مجموعة من المدونين تقريبا بيكونوا متوافقين أو نقدر نقول مندمجين ومنهم المتفقين ومنهم المختلفين, لكن حتى في وجود اختلاف بيقدروا يتناقشوا حتى لو لم يصلوا الى نقطة التقاء,
نفس المجتمع ده لو اتوجد فيه الشاب اللي عاوز يتجوز ووجد فعلا بنت مدونة يشعر ان في قبول مبدئي تجاهها ممكن ساعتها يلجأ لطرف ثالث يساعده على تحويل التفكير لواقع وده كان اول تعليق على التدوينة للفاضل د/ ابو يحي وادم وووافق عليه بعض المعلقين وانا منهم,
لكن سامحوني ان الزواج يكون على هيئة طلب ومعاه مسوغات الطلب من عدد معين من التدوينات وماشابه فلم تعجبني الفكرة مع احترامي لفكرتكم, واخشى ان الفكرة تتطور ويكون قالب المدونة او وجود ريدر من عدمه عوامل مؤثرة في رفض الطلب :)
واسأل الله ان يجزيكم خير على نيتكم.

هناك 52 تعليقًا:

د/أبويحيى وادم يقول...

السلام عليكم ورحمة الله وبركاته

جزاكم الله خيرا ظاختنا الكريمة على مناقشة هذا الموضوع الحيوى جدا والذى متواجد بشكل كبير وان كان لايظهر على السطح

لو حدث ماحدث كما قلتى
الخطوات الصيحيحة من وجهة نظرى هى كالتالى أولا يجلس مع نفسه تماما هل هو مستعد للزواج الان ام لا
أذا كان لا فليتوقف هنا وحاول ان يبتعد قدر الامكان اما أذا كان مستعد فليكمل معى
2- يصلى صلاة أستخارة وينظر هل ما زال يجد راحه فى متابعه الامر ام لا ؟
3- لا يخاطبها هو مباشرة فى هذا الامر ولكن يجعل اخت اكبر منه على النت مثلا تكون امينه وراشده وتعرفهم الاثنين تخاطبها باالامر وتخبرها
فأن أخبرتها فالتنظر الاخت وتفعل مثل ما قلنا ايضا
أن كان هناك قبول وأرتياح فى الامر يتفضل مشكور يذهب للبيت
سياتى السؤال الطبيعى الان

ماذا ساقول لا هلى وهى ماذا ستخبر اهلها من اين تعارف الاثنين
أسمعوا اخوتى خلاصة تجربة عشر سنوات فى عالم الانترنت والتعامل مع الشباب
ان كنت رجل أخبر اهلك بالحقيقة وقناعتك التامه بما تؤمن به وتعتقده وانتى كذلك
أن حاولتم الكذب فهى بداية هدم الثقه بينكم انتم الاثنين فى نفسكم وبين بعضكم
الامر الاخر
هل يعقل أن أبدا حياتى بكذب ؟؟
ليس هناك كذب كبير وكذب صغير
ان كذبتم ستكون اساسات البيت ضعيفه جدا جدا لن تكتمل فضلا عن انها تتحمل ادوار فوقها
لن اطيل عليكم
اعتقد الصورة أصبحت واضح بعد الشىء وأنا اخبرتك خلاصة الامر بما لايدع مجال للاسئلة
وفقكم الله
وجزاكم الله خيرا مرة اخرى اختى الكريمه

والسلام عليكم ورحمه الله وبركاته

Maha يقول...

أخيرا يا مناجاة تدوينة .. في انتظار التعليقات لأن موضوعها مهم جدا :)

Maha يقول...

للاشتراك

سومه...مجنونه فى بلد عاقل يقول...

السؤال دا للرجال مش للنساء طبعا بس انا حرد عليكى بشىء بسيط قوى ازاى تقدر تثق فى انسان متعرفش عنه غير كلماته....وازاى حيتم التعارف....بغير مقابلات خارج البيت....انا عن نفسى مقدرش اعمل شىء خارج اراده اهلى...واهلى مش حيروضوا وغالبا غالبيه الاهل لن يوافقوا اذا حيكون لقاء سرى هو مش اللقاء السرى عن الاهل يبقى عيب وحرام؟؟؟؟

انا بقى ليا راى اخر ليه الناس تخاف من الخطوبه الخطبه شرعا للتعارف بين الراجل والمراه ولو عند المتدينين يبقى تلات رؤيات شرعيه برايى لو فى بنت عجبت ولد يتقدم رسميا بلا اى خوف لاهلها وليه تلات قعدات ولو معجبش يتكل بمنتهى السهوله وربنا يرزقه بغيرها ويرزقها بغيره احنا اللى مكلكعينها وجبناء
تحياتى ليكى سومه_87

سومه...مجنونه فى بلد عاقل يقول...

نسيت شىء صغير يا مناجاه
الناس بتكذب كذب اعوذ بالله بطريقه رهيبه على النت فصعب تجدى ولد صادق فى كلماته وايضا البنات بتكذب خوفا من معرفتها....اذا تخطينا مرحله الخوف واصبح الرجال رجال غير جبناء او اندال تحل المشكلات

لماضة يقول...

هي مدونة دي بقت مرض ولا ايه
ههههههههه
والله انا شايفه ان ده قسمه ونصيب
وكون التدوين يجمع بين اتنين فده شىء جميل بشرط انه لا يتعدى حدود الادب
بس ازاي تقدري تحكمي على ا لجديه في الكلام في موضوع زي ده على النت هنا مربط الفرس
وفي الاخر اقول النصيب وارادة ربنا هي اللى هتحدد

لماضة يقول...

بتفق مع ابو يحيى وادم تمام الاتفاق

رئـــــيسـة حزب الأحلام يقول...

احييك عل هذا الموضوع الحيوى جد
وعلى فكرة فى ناس عاوزة تعمل على المدونات توفيق راسين فى الحلال
ودة ممكن يساعد الناس اكتر وبجد فكرة حلوة محتاجنها جدا فى وقت لا يوجد وسائل تعارف فى ظل التكنولوجيا التىى اكتسحت كل شئ
ليه مانستفدشى من التكنولوجيا دى فى حاجة خير
تحياتى لكى

امام الجيل يقول...

جميل
بوست رائع جدا وموضوع مثير

والله اعتقد بالنسبة للملتزمين خاصة
ان موضوع الزواج من خلال المدونات ممكن يكون انسب عن اى حد

خاصة عدم المخالطة الكثيرة للفتيات
او حتى فى العمل بتكون اكيد بحدودها الشرعية
فيبقى ان المدونات كما ذكرتى حضرتك باب كبير يمكن من خلاله التعرف على الافكار وطريقه التفكير بل وطريقه العيش واسلوبه

بس هو الموضوع مش سهل خصوصا
كما ذكرتى حضرتك ايضا ان فكرة الزواج من النت ايا كان مصرها مستغربة عندنا
مهما كانت ناجحة وصعب بالذات على البنت انها تقول انها هتتجوز واتعرفت على واحد من النت
لان مفيش كتير يعرفوا ان فيه مدونات طريقة التعامل معاها بخلاف الشات مثلا

ويظل برضه ان فيه ستار بين الطرفين وهو ستار عميق
من الممكن ان تختلف الشخصيات عن طبيعة تصرفها فى مدوناتها مش لازم يكون اختلاف جذرى بس يعنى محدش فى المدونات هيبين عيوبه ومساوئه
او على الاقل هيحاول انه ميظهرهاش بطبيعة الحال لما بنتعامل مع اى شخص خارج نطاق الاسرة مثلا فاكيد بيكون فيه معاملة اخرى غير مع الاهل

انا مش برفش الفكرة بس بفكر بصوت عالى
بل بالعكس اؤيدها كمان

لان كما ذكرت ان الملتزمين لما بتزوجوا فبيتزوجوا من خلال اان حد يوصفلهم واحدة واخلاقها واحترامها واهلها بس صعب حد يوصف فكرها او طريقة معيشتها وتعاملها مع الغير

تحياتى
موضوع رائع

عصفور المدينة يقول...

هذا جزء من تعليق لي في مدونة فرنسا هانم بتاريخ
10 نوفمبر 2007

------
من غير زعل ولا حساسية نفسي في موضوع شاغل بالي من زمان بس مكسوف أطرحه وأهي حت المناسبة

الجماعة المدونين والجماعة المدونات تلاقي الواحد دايخ على عروسة ومجال التدوين ماليان وتلاقي الأخت من دول بتقول عايزة عريس صراحة أو تلمح وتلاقي واحد عمال يقول بادور ومش لاقي نفسي في فكرة توفيقية تستفيد من التدوين لتسهيل هذه المهمة بدون مخالفات شرعية

طبعا هذا الكلام لا ينطبق علي عشان أنا متزوج ومش ناوي أعدد والتدوينة القادمة لي يوم الإثنين القادم عن تعدد الزوجات

لكن فعلا شكرا لك إنك أتحت لي الفرصة أقول الكلمتين دول كنت محرج أقولهم وياريت أي حد يقرا تعليقي يقترح فكرة معينة

فيه عندي عريس ممتاز جدا 24 سنة مدون يطلب أخت واقترحت عليه الفكرة فرحب بس رجع قالي اقترح بعدين أنا احتست مش عرفت أقترح
-----------

عصفور المدينة يقول...

نسيت أقول العريس المذكور تقريبا لقى عروسة

Sha2loob يقول...

مناجاة
أول مرة أعلق عندك بس الموضوع شدني
أصله بعيد عنك أنا حست الحوسة دي قبل كده
وبعدين الله يعمر بيتها مش حطه أي لينك ولا ميل ولا الدموع
وكنت عايز أوصلها معرفتش
لدرجة اني كلمت بنت مدونة أعرفها علشان تحاول تتعرف بيها, وفشلت أو نفضتلي الله أعلم
وطبعاً مش هعرف أقولها حاجه في تعليق علشان الواحد مش ناقص
حاجه تجنن مش كده؟
يلا على العموم أنا مستني قضاء الله وقدرة. ويحلها ربنا من عنده لأن أنا مش لاقي حل
معلش رغيت كتير بس الموضوع جه على الجرح
سلام

مناجاة يقول...

د/أبويحيى وادم
جزانا الله واياك
ربنا يكرمك خطوات مرتبة ومقبولة لكن المشكلة مازالت قائمة الرفض العام من المحيطين وإّذا كانت المشكلة قيراط على الشاب انه يقول عرفها منين فهي 24 قيراط على البنت الموضوع صعب فعلا

مناجاة يقول...

Maha
ياسلام يا مها الحمد لله اطمنتي اني نزلت تدوينة والسلام عليكم ورحمة الله
طب انتي بالذات كنت عاوزة اعرف رأيك مش انتي يابنتي من الجيل اللي بحكي عنه؟؟؟
فعلا فتات من تعليق
:)

مناجاة يقول...

سومه...مجنونه فى بلد عاقل
لأ السؤال ده للبنات كمان, وهما سؤالين مش سؤال توافقي ولا لأ ولو وافقتي تعلني للأهل للمحيطين بيكي ازاي
مش كلمات الشخص ياسومة بتعبر عنه؟
انتي نفسك اهو بتعليقك ظهر انتي بتفكري ازاي فيما يتعلق بالمموضوع اللي بنتكلم فيه,,, شوفي بقة لو انا تتبعتك في تعليقاتك وفي تدويناتك هل مش هعرف اكون صورة عنك؟؟؟
انا بتكلم كأني مدون وسومة عجبتني من خلال كلامها,, والصادق فعلا بيبان انه كلامه ماشي على نفس الوتيرة مش شوية يمين وشوية شمال
والساحة مليانة مدونين بتدخلي المدونة بتاعة حد منهم مرة واحدة وتخرجي منها وانتي بتقولي ياااااه انا مش هجي هنا تاني
اذن في قدر من المعرفة ممكن نحصل عليه من خلال الكلام
ممكن بقة لما العريس يجي البيت نشوف حاجات تانية دخل ببطيخة ولا دخل بتورتاية بيتصرف بتواضع ولا بعنجهية وغيرها من التصرفات اللي هي اصلا ممكن متكونش مؤشر للي جاي زيها زي الكلام اللي اللي انتي حاسة انه مش مؤشر للمعرفة.
بس انتي مش مجنونة ياسومة ليه عملتي في نفسك كده :))
سعيدة بوجودك

مناجاة يقول...

لماضة
المدونة مش مرض طبعا دي حاجة صحية جدا دي فترة نقاهة
انتي يابنتي واحدة اهلك كلهم عارفين انك مدونة اد الدنيا في بنات زي الفل ومدوناتهم منهى الرقي والالتزام واهلهم ميعرفوش انهم عندهم مدونات,, مش علشان المدونات فيها حاجة لا سمح الله لكن علشان الرعب الازلي من الانترنت واللي بيجيلنا من ورا الانترنت فاهماني؟
ياربي على اللماضة
:)

مناجاة يقول...

رئيسة حزب الاحلام
ياريت والله نعرف نستفيد من التدوين بالذات ده لقطة والله وممكن يتجوز من وراه عدد لا بأس به من الشباب
يلا ايدك معانا شوفيلنا فكرة حلوة نعملها
:)

مناجاة يقول...

امام الجيل
واحد من جيل الشباب
في بنات ملتزمات كتير والله بتكتب كلام رائع ينم عن شخصيتها وعن التزامها وانا اؤكدلك ان في منهم لو قعد في مكان فيه اكتر من شخصين ويكونوا بنات زيهم كمان لا يمكن تنطق الواحدة منهم بحرف
لكن التدوين بيدي جرأة في الكتابة جدا لان اللي بتكتب مش شايفة اللي بيقروا كلامها,, مازال خلق الحياء موجود
بس محدش يزعل ويقول حياء من ايه ليه هي بتقول ايه
اه في بنات كتير بتتكسف وحتى من غير وجود التزام ديني
وردا على كلمتك محدش هيبين عيوبه او مساوئه في المدونات,, طب مانفس الشخص لو اتقدم للبنت من اي مكان غير المدونات مش هيبين عيوبه ولا مساوئه بل هتكون الافضلية هنا للي بيدون لانه اتكلم كمية كلام محتاج يكون هيقعد 10 سنين خاطب علشان يقول اد الكلام ده في الزيارات ان حد سمحله اصلا انه يتكلم في التنوع الجامد اللي في المدونات
ربنا يرزقك الخير يارب ويرزقك الزوجة الصالحة من التدوين او من برة التدوين المهم تكون صالحة
:))

مناجاة يقول...

عصفور المدينة
ربنا يكرمك
هعتبر انك مشغول علشان كده حطيتلنا تعليق متعلق قبل كده :)
عاوزين نعرف البنات يعملوا ايه؟
حتى لو الواحدة جالها واحد بشهادة جميع المدونين ممتاز وبشهادتهم انها هي كمان ممتازة تعمل ايه؟؟؟؟
صعب تقول لاهلها جداا,, هي الحتة دي اللي شغلاني والله

مناجاة يقول...

Sha2loob
ولا تزعل نفسك اكيد هي مش نصيبك
ربنا يرزقك من فضله
بس كده انت متفق معايا ان التدوين ممكن يكشف عن طبيعة حد لدرجة انك كنت هتمشي في موضوع جواز

Maha يقول...

ههههههههههههه .. فتات من تعليق .. مااشي :D

رأيي هممم

يعني النت طريقة من طرق التعارف .. والتدوين أفضل طريق فرعي من الطريق العام اللى هو النت للأسباب اللى ذكرتيها من ظهور الفكر وجزء لا بأس به من الشخصية .. نقول خطوة أولى .. وبعد كده الخطوبة الحقيقية على أرض الواقع إما تؤكد إن الطرفين مناسبين لبعض ولا لأ ..

ده بالنسبة لسؤال الزواج من مدون أو من على الإنترنت بشكل عام

الجزء التاني وهو الأهم .. كيف نخبر الأهل بالموضوع اللطيف الظريف اللى هو لا لطيف ولا ظريف من وجهة نظرهم

حاجة من اتنين .. إما ييجي بمحاولة توضيح الصورة للأهل عما يحدث على الإنترنت وإنه حاجة "مش بتعض" ، و بعد فترة حتخف حالة الخوف من الإنترنت عند الأهل ومن هنا ممكن مصارحتهم دون الخوف من ردة فعل حادة

أو إن الأمر كله يخرج عن نظاق النت .. بحيث إن لا الشاب ولا الفتاة "يذكروا" إن الأمر بدأ من النت .. ممكن مثلا الشاب يخلي اخته تتعرف على الفتاة وبعدين الفتاة تخبر والدتها إن صديقة لها رشحتها لأخوها ويتم الأمر من هذا المنطلق

بس :)

ولو منفعتش الحلول دي فيعني الله أعلم والله يكون في عون الاتنين :)

ويا بخت من وفق مدونين في الحلال :D

مناجاة يقول...

Maha
ايوه كده هي دي التعليقات
طيب رأيك أكد على فكرة صعوبة توصيل الخبر للأهل
وكويس الحل اللي اقترحتيه من وجود حد وسيط
بس الا بقة لو طلع معندوش اخوات بنات,, مالناش دعوة يتصرف هو بقة
بس ايه رأيك فيا وانا عاملة فيها ام العروسة ؟؟
:)

اوعى تفكر يقول...

ههههههههههه
تصدقى فكره كويسه
يعنى فى الاول قلت ايه الكلبام الغريب ده
بس سرحت مع نفسى لمدة دقيقه
قلت كلامها ممكن يكون عندها حق فيه
لان التدوين فعلا بيعبر عن شخصية الواحد
يعنى انا عن نفسى بخرج معظم خواطرى فى مدونتى وبكتب كل اللى انا عايز اقوله
اللى ممكن معرفش اقوله لاصحابى او اخوانى

إيمان الحسيني يقول...

أعرف اتنين (شاب وفتاة) نحسبهم على خير ولا نزكي على الله أحد
التقت أفكارهم عن طريق احد المنتديات
الشاب اتكلم مع أخت كبيرة لينا وطلب منها تفاتح البنت
والبنت فاتحت أهلها وبلغتهم إن فيه عريس عن طريق النت (مع العلم بإنها منقبة)
والعريس راح البيت وحصل القبول ولله الحمد
وما شاء الله لا قوة إلا بالله امبارح كان حفل زفافهم

بارك الله لهما بارك عليهما وجمع بينهما في خير
اللهم آمين

:)

مناجاة يقول...

اوعى تفكر
هو فعلا التدوين متنفس لناس كتير بيقدروا يقولوا فيه اللي ميقدروش يقولوه في مجتمعات كتير

مناجاة يقول...

إيمان الحسيني
بسم الله ماشاء الله بشرة خير يا ايمان وحاجة فعلية شبه اللي مها بتقول عليها
ربنا يباركلهم وعقبال كل الشباب المسلم
نورتي المدونة
:))

الفاتح الجعفري يقول...

السلام عليكم يادكتورة
كيف حالكم وطال الغياب عودا حميدا
,,,,,,
موضوع مميز جدا وصعب الكلام في تفاصيله بس وما المانع اذا قدر الله عزوجل ,اظن انه لاحرج في ذلك
يا ايها الناس انا خلقناكم من ذكر وانثى وجعلناكم شعوبا وقبائل لتعارفوا ان اكرمكم عند الله اتقاكم ان الله عليم خبير
-----
كل شكل من اشكال التعارف الانساني من الممكن تشكيله ولكن كما يحب الله ويرضي
وجزاكم الله كل خير

sweet heart يقول...

السلام عليكم ورحمة الله وبركاتة

ما شاء الله عليكى فعلا موضوع متميز
ومحير لكن فى الحقيقة حصل مع صديقة لاختى فى منتدى اسلامى فصاحب الموقع اعجب بطريقة تفكيرها وفعلا بقدر الله تم الزفاف من حوالى سنة وما شاء الله عليهم ولكن انا عن نفسى اول ما سمعت حكايتها استغربت جدا ازاى ممكن فعلا الواحد يقدم على خطوة مهمة زى دى بالطريقة دى وأخذ الموضوع دة حيز كبير من تفكيرى وقتها وفتحنا انا والعائلة عندى نقاش مطول فى الموضوع دة وفوجئت بوالدتى بترحيبها للفكرة جدا مادام بيحكمها ضوابط شرعية زى اى شخص متقدم وانا مع راى د / ابو يحى فى الخطوات المتبعة فى هذة الطريقة ولكن يبقى السؤال المهم هل كل مدون او مدونة كتاباتهم فعلا بتعبر بطريقة صحيحة عن فكرهم وشخصيتهم ؟
وتبقى الاجابة
اللهم ارزق بنات وشباب المسلمين ازواجا وزوجات صالحات

لماضة يقول...

انا رديت على الموضوع بلماضه
لانه كان يستحق
قوليلي رايك بقى يا دكتوره

فليعد للدين مجده يقول...

مجتمع التدوين كأي مجتمع تسري عليه نفس القوانين والشرائع والاعراف المتبعة في الخطوبة والزواج

إلا أن النشاط التدويني يتيح حرية أكبر في التعارف والتعبير عن الاراء والاتجاهات، ومن هنا فهذا الموضوع فعلا هام والتدوين يقوم بدور فاعل في تيسير الزواج

شكرا لك علي الطرح

Jana يقول...

اسمحيلى ان أشارك برأيى
الموضوع أثار اهتمامى من فترة .لأنه عجيب جدا انك تلاقى أم او اخت تسأل كل من حولها عن عريس لفتاة ..فقط ان كان سنه وعمله مناسبين فليتقدم للخطبة والباقى امره سهل ...طب ليه بقى الاهل يستنكروا فكرة ان يكون معرفة العريس عن طريق النت !!؟؟.. بالعكس انا شايفة ان لو اعجب أحدهم بفتاة مدونة يعنى أعجب بعقلها وتفكيرها وشخصيتها وده اللى بيبان فعلا من خلال المدونة..والباقى يعنى القبول الشكلى وتعارف الاهل ييجى بعد كده
رأيى برده ان فى التدوين الامر يختلف عن المنتديات
فى المدونة تظهر حقيقة صاحبها ويصبح سهلا للغير رسم صورة جلية الى حد ما عنه
اما فى المنتديات ..الامور مبهمة وقد يدعى البعض المثالية وهنا تظهر المشاكل حين الالتقاء على ارض الواقع

الفكرة جميلة ..وأجدها فرصة حلوة لكتير من الشباب..انا نفسى ساعات بابقى نفسى اجوز ده لدى ودى لده من كتر مانا شايفاهم مناسبين لبعض ومستغربة ازاى هم مش شايفين ده
اسفة على الاطالة
لكن الموضوع شدنى الصراحة
تقبلى مرورى
ورائعة فكرتك وفتحك للموضوع ده
تحياتى الخالصة

مناجاة يقول...

الفاتح الجعفري
ربنا يكرمك ويجزيك كل خير وينفع بيك

انت ذكرت الخلاصة في الموضوع ده " كما يحب الله ويرضى "

انا مش غايبة ولا حاجة بس احيانا بحب اتابع وانا appear offline
:)

خاطبة المدونات يقول...

نريد متطوعون لإنجاح فكرة المدونة
ومن يجد في نفسه حب الخير فليتفضل
elkhatbah60@yahoo.com

مناجاة يقول...

sweet heart
عليكم السلام ورحمة الله وبركاته
اهلا بيكي
طالما في ضوابط لأي موضوع تأكدي انك ماشية صح
وكويس انك اقتنعتي, بس المهم تتوجد الفرصة الكويسة
ربنا يرزقك الخير

مناجاة يقول...

لماضة
هجيلك على مدونتك يالماضة وسامحيني اتأخرت عليكي في الرد

مناجاة يقول...

فليعد للدين مجده
مرحبا بك
كلامك صح
طالما اتوجد مجتمع تتوجد فكرة الزواج
شكرا لمرورك

مناجاة يقول...

Jana
اهلا بيكي يسعدني مرورك
ربنا يكرمك موافقاكي على كلامك,
زي ماذكرت في التدوينة ان في بنات كتير المدونة بتتيح ليهم الفرصة للظهور اكتر من مجتمعات تانية اعتمادا على انها وراء الكيبورد, بجد هنيئا لمن يفوز

مناجاة يقول...
أزال المؤلف هذا التعليق.
ادم المصرى يقول...

انا بجد سعيد بى البوست الرائع ده وفعلا التدوين لى كذا فكره تنيا عن كدا غير الارتباط بين اتنين ممكن نعمل اعلانات طلب زواج بردو مش عيب بلعكس دا سواب كمان اتمنا زياره مدونتى ونتعاون فى افكارنا وان شاء الله نلاقى فكره ونجتمع عليها كلنا

mohammed alsha3r يقول...

وايه المشكله فى كدا
بس ياريت لو يكون فى ظوابط ليس اكثر ولا اقل

الراقص مع الذئاب يقول...

السلام عليكم
اولا جزاكي الله خيرا اختنا الكريم علي فكرة الموضوع الرائعة
ولنتناقش بموضوعية إذا سمحتي وسمح لي الاعضاء الكرام
ولنبدأ في طرح الأسئلة:
لماذا دخلت أو دخلتي عالم التدوين؟
لكي اعبر هن نفسي وعن افكارى واشارك البعض في افكارهم واستفيد من خبراتهم وتجاربهم و.....و.....و.....
هذه إجابة السؤال الذي سوف يرد بها اي مدون أو مدونة أذا سألتيه
ولم يزكر موضوع الزواج او البحث عنه
إذن فالهدف الاساسي من التدوين واضح وصريح
سؤال آخر
هل يظهر كل مدون ومدونة بصورته الاصلية كما هو في الطبيعة...؟
بمعني هل تجد عيوبه ومميزاته وتفهمها من خلال موضوعاته؟
نعم قد اري ذلك
فتوجد مدونات لا تعجبني افكار أصحابها ولا طريقة ردودهم او تحاورهم أو حتي اسم وشكل مدوناتهم
ولكن...هناك جزء خفي بالتأكيد

إذن هذه نقطة ايجابية في موضوعنا الاصلي
وهي أن المدونة (قد) تظهر شخصية كاتبها

سؤال آخر:
هل تتخيل او تتخيلي شكل المدون أو المدونة التي تدخلينها أو تدخلها؟؟

بالطبع اكون صورة إفتراضية...فهو إنسان وليس آلة....

وما هي هذه الصورة....وبدون خجل؟

مممم اراه وسيم قوي الشخصية كما يظهر في مواضيعه...بشوش الوجه...رومانسي...و...
إنتظري قليلا يا أختي الفاضلة
انكي تصفين فارس احلامك كما يبدوا
ما هو السبب الذي جعلك تفكرين في شكله وتضعين صورة إفتراضية (كما تحبينها) لهذا الشخص

...............

نعم لا توجد عندك إجابة محددة

وانت يا اخي الكريم هل تخيلت فلانة صاحبة المدونة الفلانية؟؟

....نعم رسمت لها صورة في مخيلتي فهي متدينة..طائعة..مريحة...رقيقة....جذابة....هادئة...رومانسية
مهلاً اخي الكريم
لماذا تخيلتها كذلك؟؟

صراحة لا أدري

انا اقول لك...
انت تريدها كذلك....تريدها كما ترسم صورة فتاة احلامك

هذا ما يحدث بين المدونين ويمنعهم الخجل من البوح به....

وحدث الآتي:
اجتمع المدونون يوماً للتعارف في ارض الواقع
وانتظر فلان وفلانة هذا اليوم علي أحر من الجمر
هي تخفي لهفتها وتقول لنفسها انا ذاهبة لأري فلانة وفلانة والاستاذ فلان الذي اعتبره والدي...وبقية الزملاء اخوة لي....ولكن ما يختفي في داخلها غير ذلك...وهي تنكره ولا تعترف به لنفسها

اما فلان فيجهز للأمر مثلها تماماً ويجد في نفسه ما في نفسها تماماً

وتأتي اللحظة الحاسمة ويجتمع الجميع
ويتعارف الجميع فيما بينهم (اجتماع محترم) وتحدث المفاجأة
تجد فلانة فلان شخص غير الذي تخيلته وتصورته نهائياً
تحدث لها صدمة خفية في داخلها
أو قد يجد فلان فلانة بعكس صورتها التي في مخيلته
وينهار قصر الاحلام الوردية لكلاهما او علي الاقل أحدهما

في نهاية الامر هلي انت ضد ام مع الزواج عن طريق المدونات

أنا ضده قي عشوائيته
لمجرد اني معجب بأسلوب فلانه إذن فهي تصلح زوجة لي
والعكس صحيح
أما إذا كان الامر منظم أو عن طريق أحد الوسطاء المحترمين المعروفين خارج مجتمع التدوين وداخله بتدينهم ونزاهتهم وأحترامهم فانا أشجع الأمر قلباً وقالباً.........

ولكن.....حتي لا يفقد التدوين هدفه...لا ينبغي ان يكون هذا الامر غاية ووسيلته المدونة


اعتزر للأطالة وجزاكي الله خيرا يا اختنا الفاضلة

ام البنات يقول...

اين انت يا دكتور
نفتقدك بشده
ولى عودة للتعليق
موضوع عن قرب ليس بالهين
احكى لك قريبا

رينـــــــــــا يقول...

السلام عليكم
امممممممممممممممممم والله يابنتى انا الحمد لله خلاص نفدت بئا
بس مبدأيا اانا مش رافضه المبدأ خالص
يعنى انا شايفه ان المدونه زيها زى اى وسيله تعارف اخرى بين الاخرين

بس اهم حاجة يكون فى ضوابط علشان ميتحولش الموضوع الى من كل هب وادب يجى يشتغل خلق الله
فهمانى انتى طبعا

خطــ المصري ــاب يقول...
أزال المؤلف هذا التعليق.
خطــ المصري ــاب يقول...

لا لا أوافق علي هذا المبدأ مع احترامي للجميع

جزيتم خيرا

أمــانــى يقول...

كل عام وانتى بخير ربنا يتقبل منكِ صالح الاعمال يااااااااارب آمــــــــين

أنا إنسان يقول...

تغطية شاملة لمسار القوافل الإغاثية المتجهة لغزة

غير معرف يقول...

في خلال الثلاثين عاما الماضية تعرضت مصر الى حملة منظمة لنشر ثقافة الهزيمة - The Culture of Defeat - بين المصريين, فظهرت أمراض اجتماعية خطيرة عانى ومازال يعانى منها خمسة وتسعون بالمئة من هذا الشعب الكادح . فلقد تحولت مصر تدريجيا الى مجتمع الخمسة بالمئه وعدنا بخطى ثابته الى عصر ماقبل الثورة .. بل أسوء بكثير من مرحلة الاقطاع.
هذه دراسة لمشاكل مصرالرئيسية قد أعددتها وتتناول كل مشاكلنا العامة والمستقاة من الواقع وطبقا للمعلومات المتاحة فى الداخل والخارج وسأنشرها تباعا وهى كالتالى:

1- الانفجار السكانى .. وكيف أنها خدعة فيقولون أننا نتكاثر ولايوجد حل وأنها مشكلة مستعصية عن الحل.
2- مشكلة الدخل القومى .. وكيف يسرقونه ويدعون أن هناك عجزا ولاأمل من خروجنا من مشكلة الديون .
3- مشكلة تعمير مصر والتى يعيش سكانها على 4% من مساحتها.
4 - العدالة الاجتماعية .. وأطفال الشوارع والذين يملكون كل شىء .
5 - ضرورة الاتحاد مع السودان لتوفير الغذاء وحماية الأمن القومى المصرى.
6 - رئيس مصر القادم .. شروطه ومواصفاته حتى ترجع مصر الى عهدها السابق كدولة لها وزن اقليمى عربيا وافريقيا.
ارجو من كل من يقراء هذا ان يزور ( مقالات ثقافة الهزيمة) فى هذا الرابط:

http://www.ouregypt.us/culture/main.html

أنين الروح يقول...

السلام عليكم ورحمة الله وبركاته

اولا احب احيكى على المدونه بشكل علم وعلى التدوينه دى بشكل خاص

الموضوع انا شايف فعلا ان دا هيكون شيء كويس ومن ناحية التواصل فمعتقدش ان دى مشكله لأن الايميل موجود بعد ما يرتاح الطرفين لبعض ويعرفوا ظروف بعض وتحصل الموافقه المبدأيه يتم النوجه الى بيت الاخت والتقدم اليها رسميا

ودى مجرد وجهة نظر فردية

وجزاكم الله خيرا

ammola يقول...

السلام عليكم
فيييينك؟؟
غطسانة ليه؟؟
ياللا بأه كفاية
عوودى يا مناااجاة
:)

م/ الحسيني لزومي يقول...

من اجل مصر
شارك في الحملة الشعبية للقيد بالجداول الانتخابية وادعو غيرك
ضع بنر الحملة علي مدونتك
البنر موجود علي مدونتي
اذا كنت ترغب في وضعه علي مدونتك ارسل ميلك كي ارسل لك كود البنر
ارجو المعذرة للدخول بلا مقدمات لأني ادخل علي مئات المدونات يوميا

BinO يقول...

كنت ابتديت أكتب تعليق علي الموضوع
وبعدين لاقيت التاريخ قديموالناس بصراحة اتكلمت في كل جانب وانا جانب سلبي في هذا الموضوع
ماعلينا
انا كنت جاي اقول تقبل الله منا ومنكم
وكل عام وانتم بخير