دول فقراء ولاتهيؤات؟

حارس عمارة عنده كوم لحم بيناموا في عز الشتا ده على كوم هدوم
(اي حاجة غير سرير يعني) معندوش ولا كرسي ولا كنبة حد يقعد عليهم
(هتقولوا هما بيحبوا يقعدوا عالأرض )
ماشي بيحبوا كده هاعديها
الاب حريقة سجاير
الابناء كل واحد منهم ميقدرش يعيش من غير موبايل مع تغيير النغمات واللوجوهات بصفة دورية
عندهم دش ومايعديش يوم عليهم من غير ميتفرجوا على ميلودي وروتالا سينيما
(ايوه انا كاتباها صح)
احيانا يهفهم مزاجهم ويجيبوا عشوة من كووك دور

واحدة بتجري على ولادها علشان تساعد جوزها في الايام الصعبة اللي احنا فيها
(ده كلامها)
تشتغل في بيت مثلا طول اليوم وتروح مش شايفة قدامها من التعب
وهي مروحة بيتها تروح السوبر ماركت علشان تشتري لولادها لانشون وجبنة شيدر واحيانا هامبرجر وكاتشب

بيت يشكو الفقر طول السنة من مصروفات المدارس وكسوة الأعياد
ولما يجي فرح حد من ولادهم لازم يكون في دي جي
وهو ينفع يكون ابنهم ولا بنتهم اقل من ولاد الجيران ده حتى تبقى عيبة

واحدة موظفة حالتها كرب بتستنى مرتب الشهر الجاي من يوم ماتقبض مرتب الشهر الحالي بتقول انها لازم تروح كارفور علشان في حاجات حلوة بيكون عليها
ديسكاون (مكتوبة صح دي كمان)
الحاجات الحلوة دي ممكن تكون اساسا كماليات في حد ذاتها مش اساسيات ده غير عناء المشوار لكارفور في المواصلات

نماذج كتير محيرة دول فعلا فقراء ولا مش فقراء

دول تجوز عليهم الصدقة ولا لأ

تجوز عليهم الزكاة ولا لأ